ياثالث النونين يا حبة الخال
يا زين نونينن على سحر خديك
فيك الحلا ما ياصفه قايلن قال
ومن الغلا مادري على وين اوديك
مساك خيرن يالغلا طيّب الفال
مع قلب عاشق صار يخلج بكفيك
فصلت لك ثوبن من الشعر وامثال
ووشاح عنقن لك تدلى بردنيك
ان كان تنشد يالغلا كيف الاحوال
عينيك تنظر وانت صدّق لعينيك
طيور حبك بالجوى صارت اجوال
واعروق قلبي م التشوق تناديك
يومن وراء يومن على مثل منوال
ظميان واقف ينتظر جري واديك
يا مهيّج الاشعار يا صوت موال
اكتبه انا شوقن لعينك واغنيك
سوّاح في الدنيا ب حل(ن) وترحال
او مركبن ميّت بشوفة موانيك
قهويتني من دلة الموت فنجال
وانا من ادلال الغلا دوم اقهويك
ولا نقص حبك مع الضيم مثقال
يا ماشي (ن) نبت الذهب في مواطيك
تسحر لك عيونن وراء ظلمة الشال
والبسمة اللي تربك القلب تربيك
كم من عزيزن ذاق منهنَّ الاذلال
يذِّن ب رجمن عالي(ن) كنه الديك
بدل ثقيل العقل باسبابك هبال
كم داس في رجله حبال الشرابيك
يلج كون الفكر من جال لا جال
بعمق الفكر والفكر ماهوب حاويك
يا ممكن واصبح من احواله محال
شح الدهر لي وانت بالدوم يعطيك
يذوب من زينك على النحر سلسال
در العقود بزين عنقك مماليك
الكل من زينك من الهول مهتال
شيوخ الهوى حطيتهم لك صعاليك
كله سبب نونين مع حبة الخال
يا زين نونينن على سحر خديك